Ministrat evropianë pajtohen që Greqia t’i japë fund programit të shpëtimit

Ndaje:
Kombet e Eurozonës janë pajtuar që Greqia t’i japë fund programit tetëvjeçar të shpëtimit, në mënyrë që t’i menaxhojë më mirë borxhet.

Ministrat e Financave të 19 kombeve kanë arritur një kompromis në orët e hershme të 22 qershorit, pas negociatave maratonike në Luksemburg.

Ministrat kanë qenë nën presion për të finalizuar marrëveshjen, e cila do t’i lejojë Greqisë të dalë e sigurt nga plani i shpëtimit më 20 gusht dhe të përballet me tregun sërish.

“Kriza greke përfundon sonte këtu”, ka thënë Komisionari i Bashkimit Evropian për Çështje Ekonomike, Pierre Moscovici.

“Më në fund do t’i japim fund kësaj rruge, e cila ka qenë e gjatë dhe e vështirë. Ky është moment historik”, ka thënë ai.

Sipas marrëveshjes, Greqia mund të vonojë shlyerjen e miliarda eurove kredi për 10 vjet të tjera.

Ajo gjithashtu është ndihmuar me një tjetër ndihmë financiare në vlerë të 15 miliardë eurove.

Në tetë vjetët e fundit, Greqia ka pranuar 275 miliardë euro mbështetje financiare nga BE-ja.

“Procesi ka zgjatur pak më shumë se që kemi pritur, mirëpo ka përfunduar mirë”, është shprehur ministri grek i Financave, Euclid Tsakalotos.

“Mendoj se ky është fundi i krizës greke.. moment historik”, ka thënë ndër të tjera ai./KI

SQARIM: Dritarja.info mban të drejtën e përzgjedhjes së komenteve që do të publikohen. Komentet që përmbajnë gjuhë të urrejtjes, përmbajnë sharje dhe lëndime, si dhe komentet që nuk ndërlidhen me artikullin në të cilin komentoni, nuk i publikojmë.

Ju faleminderit për mirëkuptim!